Una cena e una vísita de Bèrgom... tut en lengua

I dí 28 e 29 de Novembre del 2015 i restarà per sempre end el mé cœr come i dó dí de la lombardofonia. Quan que ho organizad la segonda Cena Lombardòfona, al principi savivi mia que g'havereix havid come hòspeds dó car scłets de Barcelona, anca lor lingüisty, o an'mò que el dí dopo ghe sereix staid l'encontre del Comitad Lombard per la Salvaguàrdia dei Patrimoni Lingüístic. L'è staida una sorpresona que l'ha transformad un fin de setimana qualsevœl en vun per mi indesmentegable.

La cena l'è staida cłamada "Viva el Sped!" perquè questa volta ho volid far conóscer a tuts el famós sped bressan e per fortuna l'è płaxid a tuts! La carn, la polenta, la pocha, l'è staida una bella sorpresona. E la sorpresona l'è staida anca descobrir que notre lombards, ol Joancarlo Giavass, el Pedre Cociancich, el Dàvid Grim, ol Miquel Guilardell, el Dàrio Pederçan e mi, capívom perfetament i nosts dó amic de Barcelona, l'Albert Badosa Roldós e el Marc Flores, dó bravi scłets gestor del blog Linguo-resistència, que i parlava catalan. Ma anci, adiritura anca lor i ne capiva perfetament, sença dover doperar l'italian o el spagnœl per comunicar. La cena la s'è consumada end el milłor de li manere, hom parlad, jugad, ridid come mats... e l'endoman som naids tuts ensema a l'encontre del Comitad SPL, que questa volta el se tegniva a Bèrgom Alta (la cità vecła) e que l'hiva organizad una vísita turística de la cità completament en lengua lombarda. A part el freid mortal e la longa caminada, anca la domínica l'è staida bellíssima. Girar per Bèrgom parland en lengua, descobrir tute li atraccion del post, parlar cond gent de Milan, de Bèrgom, de Com, de Crema, de Sondri... l'è staida un'esperiença que me senti de consilłar a tuts! E soratut ve envidi a cłapar una bella chicolata end la famosa pasticeria/bar La Marianna de Bèrgom, perquè hom descovert que end i bagny gh'è la scriita "homeny/fomne".

Cłapi l'ocasion anca per rengraciar qui que l'ha mia partecipad a la cena, ma que l'ha organizad l'encontre a Bèrgom: la Simona Scuri, el Lissandre Brasca e el nost relador de la sociacion BGIS que 'l n'ha faid de güida, el Simon Carsana.