21 feb 2015

El reloi l'è miga precís per tuts

Cognossii un quai amix o parent che al riva sèmper in retard? Una de quei persone che, anca se i prœvan a rivar puntuai, i ghe la fann propi miga? D'incœ al gh'è un studi che al dimostra come la saghe miga tuta colpa de la maleducazion dei persone, ma che la colpa la g'havaríss de vésser cercada ind i capacità naturai dei individui.
Un studi conduxud dal Dotor Jeff Conte de la Università de San Diego, ind la Califòrnia, l'ha dimostrad che podom trovar do categorie de persone: quelle che le g'hann una bona e puntual percezion del temp e quelle che i ghe l'hann no, rivant a percepir el temp ind una manera plœ lenta e donca manc precisa. Un esperiment che l'ha vist un grup de persone partecipar a un esperiment de percezion del temp. Ai persone al gh'era stait demandad se i eran puntüai o no e i eran staits de conseguenza dividids segond la soa resposta.
El resultat de l'esperiment l'è stait sorprendent. Tute i persone puntuai le havevan totalizad un temp medi de 58 segonds respet ai 60'' stabelids da l'esperiment, intant che i retardatàrie le havevan totalizad un temp medi de 77 segonds.
Atenzion, però, perchè el studi del Conte l'è miga una scusa per i ritardatari crònic. Quell studi lí defait l'ha dimostrad come al baste un reloi per dar ai persone la jœsta percezion del temp e a far-ga miga far plœ ritard. I scuse, donca, le serven a nagot!